Home . Aktualitet . Kronike . Kush gënjen, Uashingtoni, Merkel, Mogherini… apo Basha?!

Kush gënjen, Uashingtoni, Merkel, Mogherini… apo Basha?!

I vendosur përpara një presioni gjithmonë e më të fortë të ndërkombëtarëve, Lulzim Basha ka gjetur një taktikë të re për të mbajtur me “oksigjen” çadrën e tij, interpretimin krejt të kundërt të asaj që është shkruar e bardhë mbi të zezë.

Atëherë kur deklaratat e ndërkombëtarëve, si ajo e Ministrit Gjerman të Punëve të Jashtme, Sigmar Gabriel janë aq të thëna troç sa nuk lënë vend për ekuivok, atëherë këta personalitete shpallen thjesht si të painformuar.

Pas keqinterpretimit të deklaratave të Merkel, Mogherinit apo Ambasadës Amerikane, tashmë Basha shkon edhe më tej, duke “futur duart” edhe në deklaratën e Departamentit Amerikan të Shtetit.

Lexo.al, pa bërë asnjë interpretim, publikon pesë deklaratat nga deklaratat më të rëndësishme të ndërkombëtarëve dhe intepretimin që ka bërë Basha nga ana e tij.

Deklarata e DASH pas takimit me ministrin Bushati

“Zv/Sekretari riafirmoi partneritetin e ngushtë midis SHBA-ve dhe Shqipërisë, mbështetjen tonë të fortë për reformën në drejtësi dhe përkushtimin tonë të përbashkët ndaj vlerave demokratike, shtetit ligjor dhe respektit për të drejtat e njeriut. Ambasadori Shannon gjithashtu theksoi rëndësinë e pjesëmarrjes së të gjithë forcave politike në zgjedhjet e ardhshme parlamentare”.

Interpretimi i PD-së: “Shuplakë për Ramën. SHBA këmbëngul që zgjedhjet parlamentare në Shqipëri duhet të zhvillohen me pjesëmarrjen e opozitës dhe të gjitha partive politike”.

Ministri i Jashtëm i Gjermanisë, Sigmar Gabriel

“Bojkoti i Parlamentit është absurd.  Deputetët duhet të bëjnë punën e tyre në Parlament dhe jo të protestojnë në ҫadër. Ky është një qëndrim që Gjermania nuk e pranon dhe do të bëjë gjithçka që opozita të shkojë në Parlament dhe të marrë pjesë në zgjedhjet parlamentare. Që opozita të mos e dojë qeverine është normale, por rruga është e papranueshme”

Interpretimi Bumçi: Unë mund të them që ministri gjerman ishte i painformuar. Kjo mund të vijë nga fakti që ka pak javë që është në detyrë, pas lënies së detyrës nga ish-ministri i Jashtëm që u zgjodh president dhe ngarkesës së madhe që ka arena ndërkombëtare.

Deklarata Seibert, zëdhënësi personal i Kancelares Merkel
“Ajo që mund t’iu them është se qeveria federale e Gjermanisë mbështet kursin e reformave të qeverisë shqiptare. Thirrjet për dhunë, që dëgjohen herë pas here, nuk mund dhe nuk duhet të jenë një nga mjetet për të imponuar pozicione politike kontroverse”.

Basha: “Kancelarja Merkel mbështet kauzën tone! Dua ta siguroj Kancelaren dhe popullin gjerman se shqiptarët janë të vendosur të përqafojnë të gjitha vlerat europiane dhe të ndërtojnë një shoqëri të denjë për të gjithë, duke luftuar krimin, drogën, korrupsionin dhe duke e çliruar politikën prej tyre”.

Ambasada Amerikane në Tiranë

“Qeveria e Shteteve te Bashkuara mbështet zgjedhje të lira dhe të ndershme, dekriminalizimin dhe luftën kundër narkotikëve, por këto çështje nuk duhet të përdoren si shfajësime për të bojkotuar Parlamentin, për të bllokuar zgjedhjet, apo për të vonuar zbatimin e reformës së gjyqësorit. Nxisim dialogun midis qeverisë dhe opozitës për t’i zgjidhur këto”.

Basha: “Kemi marrë mbështetje totale në Uashington dhe këtë mbështetje e përkthejmë në këtë aksion politik që ka vetëm një synim, Shqipërinë e standardit europian. Nuk do të ketë asnjë tërheqje”.

Komisionerja e Punëve të Jashtme, Federica Mogherini

Federica Mogherini: “Loja e futbollit bëhet brenda fushës dhe jo jashtë saj. Ndaj betejat duhet të bëhen brenda institucioneve, Parlamentit në këtë rast”.

Basha: “Sapo përfundova një takim me Përfaqësuesen e Lartë për Politikën e Jashtme të Bashkimit Europian, znj.Federica Mogherini. Pata rastin ta njoh konkretisht me rrugëzgjidhjen e propozuar nga opozita për krizën e rëndë politike që vendi po kalon”./Lexo.al/

Mos humbisni:
Gjykata e Prishtinës lëshon urdhërarrest për Albin Kurtin

Close