LAJMI I FUNDIT
Home . Opinione . Përse mund ta takosh djalin e një kryeministri të korruptuar, pasi ke takuar kryeministrin?

Përse mund ta takosh djalin e një kryeministri të korruptuar, pasi ke takuar kryeministrin?

Nga Mero Baze

Ka një detaj domethënës, e-maili që drejtori i CEZ për Shqipërinë, i dërgon shefit të tij në Pragë, lidhur me takimin që do të kishin me kryeministrin Sali Berisha në Tiranë dhe më pas me djalin e tij.

Detaji është, që takimi me djalin, do të shtyhej dhe duhej bërë pas takimit me kryeministrin, takim nga i cili, siç rekomandonte sekseri Kalaj, pritej të realizoheshin gjithë pritshmëritë e tyre për çfarë kishin kërkuar shtesë, lidhur me debitë që duhet t’i ngarkonin shtetit shqiptar.

Ndërmjetësi i këtij takimi, zoti Kalaj, siç thuhet dhe në e-mail, i kishte siguruar se Berisha do t’ua plotësonte të gjitha kërkesat. Këtë e kishte parandjerë dhe vetë drejtori i CEZ nga takimi spontan që kishte pasur me Berishën një ditë më parë me disa investitorë të huaj, ku Berisha i paskësh përmendur takimin që pritej.

Pas kësaj, ata kanë takuar Shkëlzenin.

Përse mund ta takosh djalin e një kryeministri në një vend autoritar dhe të korruptuar si Shqipëria, pasi ke takuar kryeministrin?

Vetëm për t’i dhënë shpërblimin. Dhe ky në të vërtetë është steriotipi i gjithë mënyrës se si ka funksionuar Berisha në raport me korrupsionin.

Edhe kur investitorët e mëdhenj ishin seriozë, edhe kur ishin jo seriozë, gjithnjë filtri ka qenë djali, ose vajza e Berishës. Kur biznesmeni milioner me origjinë nga Pakistani që jeton në Suedi, Ansar, e takoi Berishën në vitin 2007, lidhur me interesin që ai kishte për një park energjetik në Durrës, Berisha e priti shumë mirë dhe i premtoi gjithçka, por kur doli tek dera i sugjeroi që për letrat ishte mirë të merrej me një studio ligjore. Ambasadori që e shoqëronte i tregoi për kë bëhej fjala. Për vajzën e Sali Berishës. Dhe ajo i hartoi një kontratë ku i kërkonte tre për qind të vlerës së investimit, kur qeveria t’i jepte licencën për TEC-in. Bëhej fjalë për 3 milionë dollarë, për një firmë që do hidhte babai i saj.

Kur binzesmeni libanez, i cili u rrah barbarisht disa muaj më parë, ndërsa ikte për në Rinas, kërkoi të merrte një tokë për investime në Lalëz, atij ju sugjerua po ashtu e njëjta zyrë ligjore. Dhe kur ai nuk plotësoi detyrimet ndaj tyre, i filluan problemet, ju shpikën pronarë dhe e njëjta punonjëse e zyrës që e pati ndihmuar për letrat, u bë gjyqtare dhe i humbi gjyqin. Në fund iku duke “ngrënë” dhe një dru.

E njëjta gjë mund të thuhet për koncesionin e ngjyrosjes së naftës, për skanimin e kontenierëve, pullat fiskale etj, ku Familja ka marrë pjesën e saj në parajsat fiskale duke lobuar koncesionet.

Rasti i CEZ dhe e-maili i drejtorit të CEZ nga Tirana, është një ilustrim perfekt i kapjes së shtetit nga kjo Familje, dhe kthimit të saj në një “bankomat”, ku duhet të paguaje për të vazhduar më tej.

Rruga për të investuar në Shqipëri fillonte si një autostradë e madhe, me shumë korsi, që të çonin në zyrën e Berishës dhe përfundonte nga një deriçkë ku të priste në pritë, ose djali, ose vajza e tij. Nuk ka gjë më ilustruese për këtë histori se sa ky e-mail, që tregon me detaje se sa i përfshirë është djali i kryeministrit në organizimin e një takimi me kryeministrin, kur qeveria ishte në kulmin e negociatave për të toleruar kompaninë të fitonte prej saj dhe se si ai përfundon si hallka e fundit e gjithë takimeve. Ishte sikur do të takoje më të madhin e vendit, pas kryeministrit. Atë që paguhej!

Komento
Mos Humbisni:
VERIFIKIMI/ E-maili për takimin me Shkëlzenin, provohet nga axhenda e Berishës

Close