LAJMI I FUNDIT
Home . Aktualitet . SHBA izolim total Metës, prej 5 muajsh asnjë zyrtar i lartë amerikan nuk i ka shkuar në zyrë, sulmet ndaj reformës fundosin presidentin

SHBA izolim total Metës, prej 5 muajsh asnjë zyrtar i lartë amerikan nuk i ka shkuar në zyrë, sulmet ndaj reformës fundosin presidentin

Reforma në drejtësi duket se po lë pa gjumë shumë politikanë në vend. Pas 5 ditësh zgjidhen prokurorët e parë të SPAK dhe janë të shumtë emrat në politikën shqiptare që nuk e dinë se si do të jetë fati i tyre pas nisjes nga puna të Prokurorisë së Posaçme dhe Byrosë Kombëtare të Hetimit. I vetmi që deri më tani po e tregon hapur se nuk është i qetë nga ecuria e reformës në drejtësi është presidenti Ilir Meta. Ky i fundit që disa muaj më parë nisi një fushatë sulmesh ndaj reformës, ndërsa tani është rikthyer në të njëjtën linjë, ndoshta dhe më ashpër.

Por sikur të mos mjaftonte vetëm kjo, Meta ka nisur një betejë të fortë dhe ndaj ambasadorëve të huaj në vend. Ai shpalli “non grata” përfaqësuesin e OSBE, ndërsa foli dhe për korrupsion dhe që janë kthyer në lecka të Ramës. Por të gjitha këto i janë kthyer në bumerang. Nëse ballafaqojmë faktet, rezulton se Meta është futur në listën e zezë të amerikanëve. Takimi i fundit i Metës me një zyrtar të lartë të qeverisë amerikane ka ndodhur që më 13 qershor dhe që nga kjo datë presidentit nuk i ka shkuar askush në zyrë, qoftë nga ambasada, DASH, apo qoftë nga Shtëpia e Bardhë, Senati apo Kongresi.

Takimi i tij i fundit është më 13 qershor me zv/ambasadoren e SHBA, Leyla Mosses Ones për çështjen e shtyrjes së zgjedhjeve. Meta më 8 qershor anuloi zgjedhjet dhe zyrtarja e ambasadës i shkoi në zyrë duke i kërkuar llogari për këtë çështje. Pas kësaj dite, ndaj tij ka pasur bojkot total. Në shtator erdhi në Tiranë drejtori i Ballkanit në Departamentin e Shtetit, David Kostelancik, i cili nuk pati asnjë takim me Metën. Pak ditë më parë në zyrën e tij shkoi vetëm ambasadori i BE, Luigi Soreca, por mungonte përfaqësuesja e SHBA. Pra duket se ka një bojkot total nga amerikanët. Mosses Ones ka zhvilluar disa takime me kryeministrin Edi Rama dhe me kreun e opozitës Lulzim Basha, por aspak me Metën. SHBA e ka bërë të qartë se reforma në drejtësi për ta është e shenjtë dhe kush e sulmon nuk i ka mirë punët me ta. Ndërkohë duhet përmendur se Matthew Palmer në disa deklarata ka dalë hapur kundër presidentit Meta. Madje ishte ai i pari që hodhi në kosh dekretin për 13 tetorin.

Goditja për Kushtetuesen

Ilir Meta ka nisur një luftë të fortë për Gjykatën Kushtetuese, por pak ditë më par mori një goditje nga ambasada amerikane. Edhe pse kjo e fundit nuk ka pasur ende një qëndrim zyrtar, i vuri kapak gjithçkaje me reagimin që dha për emërimin e dy anëtarëve të Kushtetueses nga Kuvendi. Nëse gjërat do ishin normale, reagim do kishte që kur Meta dekretoi Besnik Muçin. Ky i fundit është anëtari i parë që emërohet sipas reformës në drejtësi dhe ishte event për t’u përshëndetur. Por ambasada nuk reagoi fare. Reagimi i saj erdhi pasi Kuvendi zgjodhi dy emrat e tij 1 muaj më pas, duke e treguar qartë se për SHBA Meta nuk ekziston. “Prej votimit unanim të reformës në drejtësi në 2016-ën, institucionet shqiptare, përfshirë edhe organet e reja të pavarura të gjyqësorit, kanë punuar fort për të përmbushur vullnetin e popullit.

Votimi i sotëm i Parlamentit çon Shqipërinë përpara në ringritjen e Gjykatës Kushtetuese, një organ jetësor për llogaridhënien dhe ekuilibrat demokratike. Shtetet e Bashkuara mbeten të përkushtuara për të mbështetur ngritjen e një sistemi gjyqësor të pavarur dhe të ndershëm në Shqipëri”, deklaroi ambasada. Pra deri më tani nuk ka pasur asnjë qëndrim për veprimet e presidentit, çka tregon se ai është tërësisht jashtë loje. Për të qenë korrektë duket theksuar se i vetmi amerikan që ka takuar Meta këto ditë është Sam Borwnback, ambasadorin për liritë fetare, takim kortezie në ambientet e konferencës që u mbajt pak ditë më parë për lirinë fetare. Se sa i takon takimeve me zyrtarë të lartë për çështje politike, Meta duket se e ka pisk punën. /Kliti Topalli

Loading...
More in Aktualitet, Kryesore
Vajza e ‘Xha Beqos’ te “Kapedani”, isha vetëm 6 vjeçe, largohesha nga mësimi për të luajtur para Hoxhës

Close