Ilir Meta e ka pranuar hapur dje se meraku i tij është te drejtësia e re dhe dosjet e vjetra.
Përgjimi i Dritan Priftit vijon të jetë ende i freskët dhe Meta është pyetur dje për videon e famshme ku shfaqet duke biseduar për 700 mijë euro. Meta ishte te Erla Mëhilli në “Euro News” dhe u pyet nëse është apo jo i korruptuar.
Moderatorja ju referua videon së famshme. Presidenti doli nga vetja duke nisur sulmet, ndërsa e cilësoi montazh të turpshëm. “Kishin bërë një montazh përmes të cilit donin të largohesha nga Berisha.
Më bënin mua presion me maskarallëqe. Meta vajti vetë dhe zgjidhi çështjen me themel dhe jo me procedura. Të drejtat e mia i shkelte Prokurori i Përgjithshëm, prokurori i çështjes dhe relatori i çështjes”, tha ai.
Nga ana tjetër presidenti doli edhe te pasuria, duke treguar se si u bë “sheik”. “Monika dihet që ka një pronë bashkë me familjen e saj, bashkë me të vëllanë të cilën e ka me leje të dhënë nga Basha dhe Rama.
Me atë pronë ne kemi mundësinë të edukojmë fëmijët jashtë vendit dhe ne duhet të falënderojmë Ramën dhe Bashën. Kjo është bërë sipas rregullave urbanistike dhe është një procedurë që ka zgjatur me vite”, tha ai
Vrasjet e “21 Janarit” Pas videos të famshme të Ilir Metës me Dritan Priftin erdhi protesta e “21 Janarit”, ku pati katër viktima. Meta foli për protestën në fjalë ku i doli në mbrojtje Berishës.
Ai deklaroi se vrasësit ishin Rama dhe Basha. “Ata qytetarë i ka vrarë Rama bashkë me Bashën. Unë kam qenë në një emision te Fevziu një natë para dorëheqjes. Në darkë te Fevziu, ai 700 mijëshi ishte montazh sepse ishin letrat.
Te Fevziu unë them nuk kam ndërmend të jap dorëheqjen, në mëngjes më bie zilja te shtëpia te Blloku edhe vjen një haber nga miqtë e mi të vjetër edhe të rinj edhe më thotë mua shiko vlerësoje më mirë këtë situatë sepse planifikohen të bëhen vrasje në protestë. Unë nuk mendoja se gjëja do shkonte atyre. Haberin ma sollën miqtë e mi matanë Oqeanit.
Më thanë ti nuk duhet të jesh në zyrë se do thonë që kjo gjë që ndodhi, ndodhi për arsye se nuk ke dhënë dorëheqjen”, tha ai. Më tej ai bëri përgjegjës Bashën për vrasjet duke thënë se nuk kishte asnjë përgjegjësi Berisha. “I shkojë Berishës në zyrë, i them doktor. Shumë mirë ishte në emision më thotë. Mirë mirë por duhet marrë situata më seriozisht. Pse më pyet?
I them situata është e tillë që unë duhet të japë dorëheqjen më parë, t’i kërkojmë prokurorisë që të hetojë pasi ata kanë planifikuar të vrasin disa njerëz në bulevard. Jo si do japësh dorëheqjen, i thashë që kam njerëz që i dinë mirë këto punë.
Bëmë një debat, por i thashë se kjo ka përfunduar. Duhet të marrim masat. Unë i kam marrë me komuna dhe ja kemi dërguar me letër zyrtare Lulzim Bashës, policisë së Shtetit, SHISH. Morëm masat.
Çfarë masash keni marrë? Se thonë ka Sali Berisha përgjegjësi, ai ka se ka vendosur ata persona në krye. Nuk është kryeministri përgjegjës për të ruajtur Kryeministrinë, është Ministri i Brendshëm që merr masat dhe verifikon” tha Meta.
Presidentit flet për kokëpalarët. Më 21 Janar 2011, Meta i cilësonte kokëpalarë protestuesit. Edhe dje ai bëri të njëjtën gjë. “Atyre u interesonte ajo që ndodhi. Merrni letrat dhe shikojini. Ju kam thënë dhe kokëpalarë unë atyre dhe ju the se ashtu ishin. Ti s’ke pse godet policinë nëse ajo rri në mënyrën më të madhe”, tha ai.
Meta: Nuk kam frikë nga SHBA
Gjatë intervistës së djeshme, i pyetur sesi ka marrëdhëniet presidenti me amerikanët, u shpreh se nuk ka asnjë konflikt me ambasadën amerikane. Ai tha se nuk ka frikë aspak nëse shpallet “non grata”. “Nuk kam asnjë konflikt me Ambasadën e SHBA. Amerika i vret banditët, normal që i vret.
Por, patriotët i respekton, unë e kam ngritur flamurin amerikan para 200 mijë shqiptarëve. Unë nuk kam ndërhyrë në zgjedhjet ne SHBA, as në politikat e tyre. Unë nga Amerika nuk kam frikë, se është vend i demokracisë, nuk kam cenuar asnjë aktivitet të Ambasadës Amerikane”, tha presidenti.
