Që nga shpërthimi i përhapjes së COVID-19, qeveria ka miratuar një sërë aktesh normative të cilat ligjërisht kërkojnë miratimin edhe nga Parlamenti. Por mbledhja e deputetëve në sallën e seancave plenare përbën rrezik për infektimin e ligjvënësve për shkak të hapësirës së ngushtë.
Kuvendi është mobilizuar dhe do të mblidhet në datën 16 prill në seancë plenare për të miratuar 12 akte normative që konsistojnë në përballimin e pandemisë së coronavirus, si në aspektin mjekësor ashtu edhe në atë financiar.
Deputetët do të duhen që të mblidhen tek salla e seancave plenare, hapësira e së cilës duket se paraqet rrezik për vetë ligjvënësit pasi mund të ekspozohen ndaj COVID-19.
Euronews Albana zbardh dy propozimet e bëra nga administrata e Kuvendit për vendosjen e ligjvënësve në sallë. Përpara se sa të futen në sallë, deputetëve do tu matet temperatura, do të pajisen me masa mbrojtëse dhe më pas do të mund të ulen në vendet e tyre.
Varianti i pari sa i takon qëndrimit në sallë konsiston në reduktimin e numrit të deputetëve, nga 140 në 91 duke përshirë këtu edhe 10 ministra që kanë edhe mandatin e ligjvënësve.
35 ligjvënës do të ulen nga krahu i opozitës, 36 nga krahu i maxhorancës, 9 tek llozhat ceremoniale ndërsa tek ulëset e qeverisë do të qëndrojnë 10 ministra.
Varianti i dytë parashikon që në sallë të jenë 122 deputet duke përfshirë edhe 10 ministra me mandat deputeti. 70 deputet do të ulen në sallë të ndarë në krahet e opozitës dhe maxhorancës, 10 ministra tek vendi i qeverisë ndërsa të tjerët tek llozhat si edhe tek vendqëndrimet e medias.
Të dyja këto variante do të shqyrtohen në mbledhjen e Konferencës së Kryetarëve që do të bëhet ditën e premte ku në rendin e ditës do të ketë edhe ndryshimin e rregullores së Kuvendit nëpërmjet së cilës i jepet dritë jeshile që mbledhjet e seancave plenare të bëhen online.
