Shtohen zërat për arrestimin e ish-kryeministrit Sali Berisha. Pas Roland Bjekos dhe Taulant Ballës, dje ka qenë kreu i PDS, Paskal Milo, i cili në një studio televizive tha se mund të ndodhë që ish-kryeministri të merret i pandehur.
“ Në 1998 organet e drejtësisë së asaj kohe synonin ose kishin ndërmend të bënin një akt të tillë mbështetur në ngjarjet e shtatorit për atë që u quajt grusht shteti. Atëherë kishte presion të madh që të mos vihej dorë mbi Berishën, sot ndodh e kundërta. Kemi një diferencë 180 kthesë në qëndrim ndërkombëtar ndaj Berishës.
Duke pasur parasysh atë fabulën që është tjerrur meqë erdhi Escobar mund të ndodhë një gjë e tillë (arrestimi) me Berishën”, tha ai. Edhe analisti Lorenc Vangjeli tha se do ketë hetime mbi Berishën dhe njerëzit e tij të afërt. “Absurdi s’ka logjikë dhe është e vështirë njësoj si të parashikosh lëvizjen e mizave në ajër.
Disa gjëra të cilat nëse i shikon më vëmendje dhe nëse njeh mirë të shkuarën dhe protagonistët njihen mirë çfarë lëvizje bën me këmbën e djathtë Berisha… të gjithë këto elementë e bëjnë ekuacionin më të lehtë. Do ketë hetime mbi Berishën dhe njerëz afër tij, hetime që janë penguar edhe për shkak të foltores. Ka një histori në 98, duket e largët. Një hetim i një prokurorie të pavarur arrestoi 6 ish zyrtarë të PD. Ajo ishte një nga ngjarjet që pasoi dramat të cilat i vuajmë dhe sot”, tha Vangjeli në “ABC Neës”.
Alarm në Foltorëe
Por vetë zërat që po qarkullojnë ditët e fundit kanë alarmuar Berishën. Media dhe njerëz pranë tij dje janë hedhur në sulm ndaj anëtarit të Këshillit Kombëtar, Roland Bejko i cili i kërkoi SPAK-ut që Berisha të vendoset nën hetim. Partia Demokratike e Gjirokastrës me anë të një reagimi deklaroi se distancohet hapur ndaj prononcimeve të papërgjegjshme të Bejkos.
Ajo dënoi gjuhën e përdorur nga Bejko duke e cilësuar njësoj me atë të Taulant Ballës, pasi edhe ai ishte një ndër personat që ka kërkuar të nisë hetimi ndaj Berishës. Duke iu drejtuar me një sërë pyetjesh, dega e Gjirokastrës kërkoi nga Bejko që të flasë lidhur me problematikat në qytet dhe jo të mbrojë kreun e PD.
“PD e Gjirokastrës distancohet plotësisht nga prononcimet e papërgjegjshme dhe absurde të ish-anëtarit të Këshillit Kombëtar, të ish-Sekretarit për Pushtetin Vendor e Decentralizimin, z.Roland Bejko. Ne si demokratë, i kërkojmë atij t’u përgjigjet disa pyetjeve dhe shqetësimeve tona: Qëkur një demokrat i vërtetë flet e sokëllet me gjuhën e Taulant Ballës? Me çfarë autoriteti flet ti në emrin tonë? Sa delegatë të erdhën nga Qarku Gjirokastër në pseudo-kuvendin e 18dhjetorit?
Kur do ngresh ndonjë problematikë tonën në kohën tënde të shpërdoruar televizive për mbrojtjen e interesave meskine të Lulzim Bravës”, shprehet PD-ja e Gjirokastrës. Po ashtu lidhur me deklaratat për nisjen e hetimit ndaj Berishës, reagoi edhe ish-presidenti Bujar Nishani. Sipas tij, si Balla ashtu edhe Basha janë të tmerruar nga ringritja e PD. “Normal, janë të tmerruar nga ringritja e PD. Sekti e di mirë se çfarë e pret” shkroi ai.
