Prokuroria e Posaçme ka instesifikuar lëvizjet për aferën me inceneratorët. Ditën e djeshme janë shpallur në kërkim ndërkombëtar krerët e dy kompanive që morën koncesionin, Stela Gugallja dhe Klodian Zoto.
Ikja nga Shqipëria, e dy njerëzve që akuzohen si kryesorë të biznesit të inceneratorëve tregon se ata kanë qenë në dijeni të plotë të veprimeve që kryenin prokurorët, hetime këto që rezultojnë të dekonspiruara.
Ata tashmë janë shpallur në kërkim ndërkombëtar nga Policia e Shtetit me kërkesë të SPAK. Ndërkohë gazeta ka mësuar se SPAK po thellohen hetimet për aferën e inceneratorëve dhe në pranga rrezikohen edhe disa zyrtarë të tjerë. Arrestimi i Gugalljas dhe Zotos mund të sjellë dhe dëshmi prej tyre mbi tenderat e realizuar.
Skema e përdorur
Stela Gugallja dhe Klodian Zoto sipas SPAK si pronarë të 2 kompanive kanë përdorur një skemë fiktive të kryerjes së pagesave, të realizuar nëpërmjet dy shoqërive tregtare respektive, për të mbuluar dhe për të fshehur natyrën e vërtetë të origjinës së paligjshme të shumave monetare, natyrën e vërtetë të transferimit dhe të zhvendosjes së tyre, të cilat në të vërtetë përbëjnë “përftim të parregullt”, si rrjedhim edhe produkt të veprës penale të korrupsionit.
Sipas SPAK, ish-ministri Lefter Koka ka marrë përfitimet e parregullta monetare, në mënyrë të tërthortë, nëpërmjet krijimit të një skeme fiktive për kryerjen e punimeve në shoqërinë konçensionare, duke përdorur disa shoqëri tregtare të tjera të kontrolluara në mënyrë të tërthortë prej tij, si dhe të kontrolluara prej subjekteve tregtare në zotërim të tij.
Marrja e përfitimeve është realizuar nëpërmjet skemës fiktive të kryerjes së punimeve dhe të kryerjes së pagesave, për të mbuluar dhe për të fshehur natyrën e vërtetë të origjinës së paligjshme të shumave monetare.
Hetimet e kryera nga SPAK
Ndërkohë, SPAK nënvizon se në hetimet e kryera, objekti ka qenë procedura e ndjekur për lidhjen e kontratës së konçensionit me objekt ndërtimin e inceneratorit të Elbasanit, kontratë e lidhur midis Ministrisë së Mjedisit dhe shoqëritë tregtare “Albtek Energy” sh.p.k.
Në njoftimin e SPAK bëhet me dije, se nga hetimet e kryera është provuar se në procedurën e dhënies së koncesionit dhe në lidhjen e kontratës nuk janë kryer të plota veprimet përgatitore për dhënien e koncesionit dhe janë shkelur rregullat për prokurorimin publik. Gjithashtu sipas SPAK nuk është zbatuar procedura e rregullt ligjore lidhur me llojin e procedurës që është përdorur për dhënien e koncesionit.
