Sali Berisha duket se po bën diversion sa i takon shpalljes së tij “non grata” nga SHBA, pasi ai ka pasur dijeni për këtë lajm qysh para disa kohësh se DASH të zyrtarizonte vendimin në maj të këtij viti.
Zoti Berisha u njoftua më 19 maj të vitit 2021 nga Sekretari amerikan, Antony Blinken, i cili përmes një shënimin në rrjetin social “Twitter”, theksoi ish-kryeministrit i ndalohej hyrja në SHBA, për shkak se ishte i përfshirë në veprime korruptive, të tilla si shpërdorim i fondeve publike dhe ndërhyrje në proceset publike, duke përfshirë përdorimin e pushtetit të tij për përfitimet e tij dhe për të pasuruar aleatët e tij politikë dhe anëtarët e familjes së tij në shpenzimet e besimit të publikut shqiptar në institucionet e tyre qeveritare dhe zyrtarët publikë.
Berisha u njoh për shpalljen “non grata” që në 2019
Për këtë vendim ish-lideri demokrat ka drejtuar gishtin nga kryeministri Edi Rama dhe miliarderin Xhorxh Soros, të cilët i bën përgjegjës se kanë lobuar pranë DASH që të ndërmarrë sanksione kundër tij dhe familjes së tij. Madje, Berisha ka shkuar deri aty sa pretendon se kryeministri Rama e ka ditur se ai do të shpallej “non grata” qysh në janar të vitit 2019.
Por gazeta ka mësuar se Berisha ka qenë në dijeni se ishte person i padëshiruar nga amerikanët që në vitin 2018, teksa personi që i ka dhënë këtë lajm të kobshëm ka qenë ish-zëvendës/ndihmësi kryesor i Sekretarit të Departamentit Amerikan të Shtetit, ambasadori Jonathan Moore.
Ky i fundit është takuar me Berishën dhe në takim që ka pasur me të i ka dhënë se në Departamentin e Shtetit po gatuhet dosja për të, ndërkohë që të njëjtën gjë mësohet se ja ka pohuar edhe një vit më vonë, më konkretisht në 6 prill të vitit 2019, gjatë një takimi që kanë zhvilluar të dy në Tiranë. Pra të gjitha këto tregojnë se Berisha u njoh për shpalljen “non grata” që në 2019 nga diplomati Moore.
PD flet për dosjen voluminoze të Berishës
Por teksa ish-kryeministri Sali Berisha bën diversion me shpalljen “non grata” dhe vijon sulmet ndaj kreut të PD, Lulzim Basha, gazeta ka mësuar se edhe selia blu ka shtuar akuzat ndaj tij. Mësohet se këtë fundjavë degëve të PD iu është dërguar një udhëzim me porosi të zotit Basha, ku bëhet e ditur se amerikanët kanë një dosje voluminoze kundër Berishës.
“Fatkeqësisht Berisha nuk del dot nga kubi i mashtrimeve pasi preferon të thërrasë sa më shumë njerëz në gënjeshtrën e tij publike, njësoj si sharlatanët e dikurshëm që thërrisnin në manipulim njerëzit për t’i hedhur më pas në humbje. Thirrja jonë për liderin historik është që të mos shpikë sajesa publike dhe mos përdorë edhe portavocen e presidentit Ilir Meta për të pompuar gënjeshtrat publike.
Berisha duhet të mësojë të respektojë dhe dojë të vërtetën, përpara se të rrëzohet nga gomari që ka hipur, pasi ai më shumë se ne e di, që dosja e tij është voluminoze dhe është kopsitur nga agjencitë amerikane. S’ka njeri në botë që zhbën “non gratën” e Berishës”, thuhet në mesazh.
Po ashtu, në udhëzim theksohet se Basha është i vendosur që të mbrojë interesat e demokratëve. “Nëse i referohemi vendimit të DASH, unë po ju përsëris se qëndrimi im mbetet i njëjtë: Nuk jam unë dhe askush prej demokratëve që të komentojmë këtë vendim. Bindja ime ka qenë dhe mbetet: Interesi as i Berishës dhe as i imi, nuk do të prevalojë mbi interesat e demokratëve”, thuhet në mesazhin e PD, drejtuar degëve demokrate
